【反修例】市民哽咽致電電台表心聲　母親聽眾勸特首聽民意

6月以來，反對修訂《逃犯條例》的市民多次上街表達訴求，政府由堅持恢復二讀，改為暫緩修訂，但至今未有撤回。7月1 日反送中示威者衝擊立法會，特首林鄭月娥翌日凌晨4時召開記者會予以譴責。昨日（7月2日）有市民哽咽致電電台節目表達心聲，有母親斥林鄭沒有聽取民意，斥她「擺班細路上檯」，為此感痛心。另有年輕聽眾坦白心聲，表示已不知用甚麼方法，可換來政府正面回應。

7月1日有55萬人遊行，要求撤回修訂案，並希望林鄭下台。當日下午有反送中示威者衝擊立法會，7月2日商業電台節目上，有4名市民致電表達對事件的看法和感受。一名姓林的男士坦言，看到香港人很絕望。因為103萬人及200萬人的遊行，也無法改變任何事。有市民以死明志，政府仍扮作甚麼也看不見，7月1日舉杯慶祝，頒發勳章給支持自己的人士，令人非常憤怒。由於壓迫及絕望，有示威者覺得別無他法，要「搏埋自己嘅未來」，「搏埋自己條命」，只為讓世界聽到他們的聲音，更直言逝去的生命竟比不上一塊玻璃。

一名姓黃的母親致電表示，已多次參與遊行。7月1日因為示威者衝擊立法會，遊行終點由政總改為遮打花園。她坦言走到尾段，分開兩條隊伍，年青人「攞晒紙皮舉晒牌，好似哀求我哋行過去幫佢咁樣」，看了內心很不舒服。她憤怒地說：「你哋依家成個政府出嚟譴責呢班年青人，我覺得應該譴責嘅係呢個政府同埋呢班官呀！」

她又斥責特首莫視民意，說一套做一套：

你點可能咁樣對班細路，你次次出嚟同我哋講，要聽民意，要同班細路傾，咁你傾咗啲乜嘢出嚟呀？你咁樣樣，兩面人嚟嘅，你仲要擺班細路上檯，做一場咁大嘅戲！要想逆轉個民意咋嘛，香港人睇得好清楚架！

她哽咽表示：「我哋年長嘅人已經覺得好無力，你林鄭月娥有冇交代過呢3個年青人……我都係為人父母，死咗3個年青人嘅父母好傷心呀！」昨日凌晨，特首也無回應記者相關提問，黃女士直斥「真係好無恥！」

另有一位年輕聽眾坦白心聲，表示自己曾於7月1日進入立法會。他稱，當日在立法會「煲底」見證比自己還年輕的高中生和大專生商討去留，指他們「有晒心理準備做死士，準備衝入立法會」，但他指「我哋真係好想講，我哋唔想做到咁，我哋唔係有個plan，我哋唔係乜嘢收錢嘅暴徒，我哋唔係IS。我哋係揾唔到任何方法，去令政府正面面對我哋200萬人嘅民意。」

他表示，根本不想走到這一步，大家也想上班上學，陪伴親人，「點解我哋要不斷喺抗爭裡面進化？邊個唔想做個安安樂樂嘅人？」他又即場朗讀聲明，回應特首於7月2日記者會上發表的內容：

致我哋嘅香港母親：

對於今日我哋用咁激進嘅方式進入立法會，我哋謹此向全香港所有嘅市民道歉。好對唔住，但係我哋別無他選，我哋唔知道用乜嘢嘅方式，可以換來政府正面嘅回應民意，100萬人嘅和平遊行，200萬人嘅和平遊行，換來嘅只係一篇新聞處嘅暫緩宣言，同埋媽媽你嘅真誠道歉。

一個、兩個、三個同行者嘅性命，令到香港人嘅心悲痛莫名。香港人同你一樣對事件嘅走向傷心、震驚，但係我哋無路可逃。你話過，你係香港人嘅母親，但係我哋喺你身上無辦法感覺到，從來都無感覺到任何嘅溫暖。

今日闖入立法會裡面嘅兒女，我哋深知道所有嘅行為必然違法，而且一定會遭到追究，甚至有生命危險。但係為咗呢個家嘅未來，我哋義無反顧向前行，目的並唔係以武力脅逼你退讓，只係希望向你表達返當初卑微嘅訴求：撤回修例；收回暴動定義；撤銷至今所有反送中抗爭者嘅控罪；追究警隊濫權嘅情況；以行政命令解散立法會，實行雙普選。

我哋好抱歉，立法會搗亂咗，但我哋唔係暴徒，而係一群熱愛香港，唔忍心見到香港墮落嘅香港人。希望你見諒，將撕裂嘅家破鏡重圓，未來我哋希望可以一齊同行。We connect，可以嗎？

我哋係立法會裡面其中一個香港兒女

最後一位聽眾是70後的李先生，他坦言因為前一位聽眾，他才真正聽到年青人的想法。對於有人指衝擊的示威者很暴力，他表示「無得分割架，大家都係為咗一個理念先出嚟咋。只不過係我哋唔明佢諗咩嘢。好似頭先聽完，我就明喇。」